Sakop sa Akrho gikonbikto

CEBU, Philippines - Usa ka sakop sa Alpha Kappa Rho nakonbikto sa kasong attempted murder human misulay sa pagpusil patay sa duha ka tinun-an sa Cebu Doctor's College (nga unibersidad na karon) nga sakop sa karibal nga fraternity nga mao ang Tau Gamma Phi niadtong Oktobre 10, 2000.

 Gikonbikto ni RTC-7 Branch 20 Judge Bienvenido Saniel Jr. mao si Christian Villalobos, tungod sa kasong pagsulay og patay sa mga biktima nga sila si Basil Jon Raya ug Rodolfo Ledesma Jr. pulos mga estudyante sa Cebu Doctors College.

 Nasayran nga si Raya nagmaneho sa L300 van ug nagpaabot sa iyang classmate nga si Rodolfo Ledesma Jr. nga nagpa-xerox sa notes alang sa ilang examination.

 Apan nalangay si Ledesma kay giatangan sa akusado nga si Villalobos ug nagsige og pangutana kun kini miyembro ba sa Tau Gama Phi.

 Wala kini tubaga ni Ledesma hangtod nga mosakay na unta kini sa van ni Raya apan kalit lang kining gipamusil atubangan sa van. Nakahapa ang duha sa pagpamusil hinungdan nga wala kini maigo apan mi-eskapo sakay sa usa ka sakyanan.

 Si Judge Saniel mihatag og gibug-aton sa testimonya ni Raya kinsa positibong mitudlo sa akusado nga si Villalobos.

Hinuon si Judge Saniel misilot lamang sa akusado og unom ka bulan ngadto na sa upat ka tuig nga pagkabilanggo. – BANAT NEWS