Cuenco wala mahulga sa China

CEBU, Philippines - Wala mahulga si Kongresista Antonio Cuenco sa (Cebu South District) sa taho nga duna nay barkong iggugubat sa nasud sa China nga nagtuyok-tuyok karon didto sa Spratly Island.

Matud pa sa Kongresista nga daan na nilang napanglantawan nga aduna gyu’y himuong lakang ang China kabahin sa maong isla, kini human usab gi-aprobahan sa Kongreso sa Pilipinas ang Archipelagic Bill nga maoy nakapalig-on sa claim sa gobyerno sa Pilipinas diha sa Kalayaan Group of Islands.

Ang Kongresista kinsa maoy nangamahan sa Baseline bill namahayag nga daghan gihapon ang mi-claim nga tag-iya sa maong Isla ,sama sa Taiwan, China, Pilipinas ug uban pa.

Apan ang Pilipinas maoy nanag-iya niini busa dili angayang mahadlok ang kagamhanan nga duna nay barkong iggugubat ang China nga nagbahas-bahas sa maong isla, matud pang Cuenco.

Matud ni Cuenco nga ang Pilipinas nagbutang usab didto sa Spratly Island og mga sakop sa Philippine Navy, Philippine Airforce ug mga sundawo nga maoy gitahasan sa pagbantay ug pagmonitor sa tibuok isla. - Rey B. Pasaporte (BANAT NEWS)