Way helmet ulo nabuak

CEBU, Philippines - Nabuak ang ulo sa usa ka tawo nga wala mag-helmet dihang ang motorsiklong iyang gisakyan nadasmag sa nag-parking nga trak de karga didto sa barangay Lagunde, lungsod sa Oslob niadtong Lunes sa gabii.

Ang biktima mao si Albert Cañete, hingkod, nga taga barangay Cogon, lungsod sa Cordova, samtang ang drayber sa de karga nga nadasmagan sa biktima mao si Kent Gonzales Amestoso, 29, minyo , nga taga Pugalo, Alcoy.

Si PO1 Rey Angelo Agustin sa Oslob Police Station mibutyag sa Banat News nga ang biktimang walay helmet nagbaguros sa pagpadagan gikan sa habagatang bahin sa lalawigan paingon sa siyudad sa Sugbo dihang paghiabot niini sa nahisgutang lugar wala kini makabantay sa nag-parking nga de karga sa daplin sa karsada.

Gumikan sa kakusog sa iyang dagan napasok ang gisakyan niining motorsiklo sa ilawom sa luyong bahin sa de karga ug tungod kay walay helmet, maayong pagkaukab sa iyang agtang kay nasabod kini sa puthaw nga dapat sa luyong bahin sa de karga dayong kahagsa niini ngadto sa sementadong karsada nga maoy hinungdan sa hinanali niyang kamatayon.

Hinuon ang tag-iya sa de karga nga mao ang pamilyang Francisca ug Stanley Abajon, sa Pugalo, Alcoy andam nga motabang sa galastohan sa lubong sa biktima. – BANAT NEWS