Graduation nabulabog tungod sa amot

CEBU, Philippines - Nabulabog ang nasabutan nga graduation ceremony sa Don Vicente Rama Elementary School diha sa barangay Basak San Nicolas ning siyudad sa Sugbu tungod kay nangreklamo ang pipila ka mga ginikanan sa mga tinun-an nga mogradwar sa nahisgutang tunghaan tungod sa ilang amotan.

Matud sa prinsipal sa maong tunghaan nga si Lourdes Tolosa nga nasabutan atol sa tigum sa mga ginikanan nga sila mag-amot og P60.

Apan sa dihang nagsugod na ang pagpangolekta sa kontribusyon giingong nangreklamo ang mga ginikanan ilabi na niadtong wala katambong sa miting.

Ang reklamo sa mga ginikanan gipadangat ngadto sa Cebu City Schools Division nga gihatagan usab niini og dinaliang pagtagad.

Matud ni City Schools Division Officer-In-Charge Victoriana Veloso nga iya nang gimanduan si Tolosa nga P20 na lang ang ipaamot sa mga graduating students.

Tuod man miingon si Tolosa nga iya nang gisultihan ang presidente sa kahugpungan sa mga ginikanan nga iuli ang sobra sa maong kantidad.

Tungod sa maong kalamboan nagkanayon ang prinsipal nga simple na lang kaayo ang ilang graduation ug dili na gani mag-toga ang mga tinun-an.

Ang Don Vicente Rama Elementary School dunay 602 ka graduating students nga gitakdang mopaso karong umaabot Marso 31.

Sa makausa pa gipahinumduman sa City Schools Division ang ubang mga tunghaan sa dakbayan alang sa pagpahigayon og labing simple nga graduation.

Kini subay usab sa kamanduan sa Department of Education (DepEd) partikular na ang DepEd Order Number 15 s. 2009. – BANAT NEWS