Guardo ok Rama ikaparang

CEBU, Philippines - Wala mahadlok si Jonathan Guardo nga makig-atbang ni Cebu City Bise Mayor Michael Rama pagka-kongresista sa habagatang distrito sa siyudad sa sunod tuig nga eleksyon.

Si Guardo nga una nang mideklarar nga magpapili og balik sa south district human mapildi sa miaging eleksyon miingon nga siya andam na sa maong posibilidad.

Ang bise mayor ning bag-uhay lang gikatahong giplanuhan ni Mayor Tomas Osmeña nga maoy padaganon sa pagka-kongresista gawas sa una na niining pamahayag nga kini maoy padaganon sa 2010 mayoralty race sa dakbayan pares ni Joy Agustus Young.

Apan ang mayor nitataw nga siya dili mangampanya sa kandidatura ni Rama bisan pa man kung kini maoy una niyang giduso nga mohulip sa iyang biyaan nga posisyon.

Kini tungod usab sa mga pagduha-duha ni Osmeña ngadto sa bise mayor nga iyang gihulagway nga sipsip sa iyang kontra partikular na ni Gobernador Gwendolyn Garcia, nga kusganong gihimakak ni Rama.