Supervisor sa CEBECO gipusil

CEBU, Philippines - Gisulod sa iyang trabahoan ug gipangutana pa sa suspek una pa gidul-itan og pusil sa ulo ug lawas ang usa ka area supervisor sa Cebu Electric Cooperative-1 sulod mismo sa opisina sa kompaniya diha sa barangay Bitoon lungsod sa Dumanjug niadtong Lunes sa alas 5:10 sa hapon.

Dead on arrival sa South General Hospital si Norberto Acop Reconilla, 56, taga barangay Looc nga   supervisor sa consumer services.

Matud ni PO2 Cristopher Barro sa Dumanjug Police sa dihang nahinabi sa Banat News, duha ka wala mailhing mga tawong nagsakay og kolor pulang motorsiklo ang gitumbok nga namusil sa biktima.

Sumala pa sa kapolisan misulod ang duha diha sa compound ug mi-parking dayon sa motor ug nangutana pa sa mga kawani kun diin makit-an ang biktima.

Human tultuli kun diin makit-an si Reconilla, gikatahong midiretso ang gunman sa buhatan niini dayong subling nangutana sa gipatay kun mao ba kini si Reconilla.

Sumala pa sa kapolisan dihang mitubag si Reconilla siya ang maong tawong gipangita daling mibunot og armas ang maong lalaki dayong pusil sa ulo niini ug human matumba giusban kini pagpusil diha sa lawas.

Ang mga trabahante sa Cebeco-1 mitug-an sa kapolisan nga yano ra usab kaayong milakaw ang gunman gawas sa buhatan ni Reconilla ug mibalik og sakay sa motorsiklo dayong padagan paingon sa direksiyon sa bukirang bahin sa lungsod sa Dumanjug.

Ang mga kauban sa trabaho sa biktima mao nay mitabang kaniya pagdala sa South General Hospital sa siyudad sa Naga apan gideklarar nga dead on arrival.

Sa paghimo ning balita padayun pa ang imbistigasyon sa kapulisan pagtumbok sa suspek ug sa motibo sa krimen. – BANAT NEWS