Sakyanang kolurom midagsang sa Lapulapu

CEBU, Philippines - Magtinabangay ang mga opisyal sa tugpahanan sa Mactan Cebu International Airport (MCIAA) ug ang mga opisyal sa dakbayan sa Lapulapu alang sa pagsumpo sa pagdagsang sa mga kplurom nga mga sakyanan sa maong dakbayan.

Kini ang nahukman human sa panagtigom sa mga opisyal sa MCIAA gipangulohan ni Airport General Manager Danilo Francia ug mga opisyal sa Lapulapu City Traffic Management System.

Gituki sa maong panagtigom ang gidusong sulat ni Francia nga nagpatabang sa konseho sa dakbayan nga masumpo ang mga kolurom nga sakyanan diha sa tugpahanan.

Sa nasayran nga nahimong problema sa tugpahanan ang maong mga sakyanan tungod kay sagad mahitabo ang kagubot tali sa mga drayber niini nga mag-ilog sa pasahero ug ingon man ang pakiglalis niini sa mga gwardiya.

Dugang pa niini nga wala ma-regulate bisan na ang pletihan niini ug kasagaran mas mahal kun itandi sa normal nga patak sa metrohan sa taxi ug kini gihulagway nga dili makaayo sa imahe sa Sugbu ngadto sa mga mata sa mga dumuduong ilabi na sa mga langyaw’ng turista.  - Romeo Limpangog (BANAT NEWS)