CEBU, Philippines - Nagkatibuwaag og panagan ang mga batang nag-educational tour kagahapon sa buntag diha sa Talisay City Fire Department sa silong nga bahin sa city hall human usa ka polis ug gwardiya diriyot magkapinusilay.
Sila si PO3 Joseph Glenn Burlas nga nadestino sa lungsod sa Tuburan ug ang gwardiya nga si Gabriel Mayorita ubos sa Lancer Security Agency sa city hall nagkabangi tungod sa wala pagsunod sa maong polis sa hustong agianan paggawas sa city hall.
Si Roger Villaver, hepe sa Civil Security Unit (CSU) sa pakighinabi niini sa Banat News mibutyag nga si Burlas wala mag-uniporme gikan mitambong sa iyang hearing diha sa Municipal Trial Court in Cities (MTCC) sa Talisay ug migawas kini sa entrance nga bahin sa pultahan dapit sa police sub-station hinungdan nga gibadlong kini ni Mayorita nga pabalikon ug adto paagion sa exit sa MTCC.
Apan imbes nga mosanong, si Burlas gikatahong mitubag sa gwardiya og “polis man ko” dayong lahos og gawas ug gipatapsingan og dam-ag ang bukton ni Mayorita.
Si Mayorita mikuyog kang Burlas paingon sa gawas apan gikatahong gibaharan siya sa maong polis nga iya kining balikon. Ning tungura, si Mayorita mitubag og “di ko mahadlok nimo.”
Ang maong polis gikatahong miadto sa iyang sakyanan ug mikuha sa iyang armas ug giluklok sa hawak dayong balik sa pultahan diin siya migawas apan wala molahos og sulod sanglit ang gwardiya mipasalipod diha sa may pultahan sa entrance.
Sa maong sitwasyon naagian sa mga batang nag-educational tour ang duha hinungdan nga naglumba sila og panagan aron motago.
Anha lang nakalma ang sitwasyon dihang nangabot sila si Chief Inspector Jovito Canlapan ug PO3 Roy Lofranco ug gidala ang duha sa police station.
Si Burlas dihang gikuhaan sa Banat News og pamahayag igo rang mitubag og “no comment”.
Si PO2 Roelito Tano kinsa maoy nag-imbestigar sa hitabo mibutyag sa Banat News nga “mis-communication” ang nahitabo tungod kay si Burlas nabag-uhan sa bag-ong sistemang gipatuman sa city hall tungod kay taud-taud na kining narelibo gikan sa Talisay.
Human sa panag-estoryahay nagkauliay sa ilang mga buot si Burlas ug Mayorita ug nagpinasayloay. - Brenda Batuto (BANAT NEWS)