Namatay human sa hearing sa Korte

CEBU, Philippines - Usa ka 77-anyos nga kihanteng negosyante dinhi sa Sugbu ang namatay human sa cross examination sa abogado sa depensa sa sala ni RTC-7 branch 20 Judge Bienvenido Saniel niadtong adlaw nga Huwebes, petsa 12 sa bulan sa Marso mga alas 9:40 ang takna sa buntag.

Kini human giatake sa sakit sa kasingkasing human sa emotional kaayong pagtestigo sa korte batok sa usa ka lending company nga iyang gikiha.

Ang namatay’ng negosyante giilang si Luciano Sarabusing, 77, minyo ug nanag-iya og 17-door apartment nga nahimutang sa barangay Labangon ning siyudad sa Sugbu.

Sigun pa ni Atty. Alex Monteclar, abogado ni Sarabusing nga ang iyang kliyente emotional kaayo sa iyang pagsaysay sa korte sa iyang kasong declaration of nullity of extra-judicial foreclosure nga gisang-at batok sa Reliable Lending.

Kini tungod kay gi-remate sa naasoy’ng lending firm ang iyang 17- door apartment bisan og P413 mil na lamang ang nahibilin sa iyang utang ug gipangayoan kini og P4 milyones aron makuha pagbalik ang naasoy’ng apartment.

Si Monteclar nagkanayon sa wala pa atakeha sa sakit ang namatay gi-cross examine kini ni Atty. Jonathan Talabo, abogado sa gikihang lending firm.

Matud pa ni Monteclar nga human sa hearing sa maong kaso, igo lang nakagawas sa court room ang iyang kliyente ug nagmulong kalibangon ug dayon nahagba.

Nakuptan pa ni Monteclar ang ulo sa kliyente una pa kini malahos sa ubos hinungdan nga gidali nila kini og dala sa tambalanan apan namatay gyud kini pipila ka oras sa pag-atiman sa doktor.

Wala pa matino kun unsay dangatan sa maong kaso tungod sa nahitabo sa kliyente ni Monteclar. –BANAT NEWS