CEBU, Philippines – Namatikdan nga mihinay-hinay na og distansya si Mayor Tomas Osmeña kang Bise Mayor Michael Rama nga maoy una niyang gipiling padaganon pagkamayor sa siyudad sa Sugbu sa 2010 elections.
Kini human ipahibawo sa mayor atol sa press conference kagahapong adlawa nga siya dili na mangampanya sa kandidatura ni Rama.
Duna nay pagduha-duha ang mayor ngadto sa bise mayor mugna usab sa giluwatang pamahayag niini atol sa Sinulog 2009 grand parade.
Kini dihang mipadayag si Rama nga iyang higala si Jonah John Rodriguez ug nangayo og pasaylo niini human papahawaa gikan sa VIP seat sa Abellana grand stand.
Si Rodriguez nakonbikto sa korte human ikiha sa asawa sa mayor nga si Margot tungod sa giingong pagpadala niini og binastos ug pagpanghulga nga text messages.
Nakadugang sa disgusto ni Osmeña mao ang giingong pagpakigsuod ni Rama ngadto kang Gobernador Gwendolyn Garcia.
“He sleeps with enemy so to speak, I’m fighting the governor he made sipsip to the governor I can’t stand it, and you know I’m fighting the governor because of him, murag alkanse ko da? He doesn’t know whose our friend and who’s our enemies are, I don’t know what the problem is,” sumala pa ni Osmeña.
Dali hinuong mikisikisi si Rama ug nangatarungan human masayod sa pamahayag sa mayor sa pag-ingong dili siya sipsip nga pagkatawo.
Gipasalig usab sa bise mayor nga ang iyang loyalty tua kang Osmeña nga iyang gikunsiderar amahan sa politika ug kini giingong nasuwayan na.
“Sama ra gud pud na ni mayor nga kung magkita silang gob.(Gov. Gwendolyn Garcia) maglamanuhay, basta ang ako lang mao ang pagserbisyo sa mga Sugbuanon,” matud ni Rama.
Taliwala niini, si Osmeña miingon nga siya mas mopabor sa sugyot nga si Kongresista Raul del Mar maoy iyang padaganon pagkamayor sa siyudad sa 2010.
Kung kini mahitabo, pagkakongresista sa habagatang distrito sa siyudad mao unyay tugpahan ni Rama nga giingon usab nga uyunan ni Osmeña.
Sa kasamtangan niingon hinuon ang mayor nga nagpabilin pa ang iyang unang gidusong Rama-Young tandem sa 2010 elections. –BANAT NEWS