... gibahad nga usban pa gyud

CEBU, Philippines – Mibahad ang kadagkuan sa Nagkahiusang Drayber sa Sugbu (NADSU) ug Pinagkakaisang Samahan ng mga Tsuper at Opereytor Nationwide (PISTON) nga subling mopahigayon og halapad nga strike sulod ning bulana.

Kini kun mapakyas karong Biyernes ang ulohang buhatan sa Land Transportation Office (LTO) ug Department of Transportation and Communication (DOTC) sa ilang gidusong position papers.

Ang grupo miduso niini ngadto ni LTO-7 Regional Director Raul Aguilos nga naghangyong ibasura ang Department Orders 2008-39 nga mipadako sa multahan sa mga motoristang makalapas sa lagda sa trapiko nga gisugdan pagpatuman niadtong Marso 2.

Gibana-banang kapin sa 300 ka mga PUJ draybers gikan sa nagkalain-laing rota ang wala mamasahero kagahapon ug midugok sa buhatan sa LTO-7.

Si Ruben Rama, secretary general sa NADSU nangangkong kapin usa ka libong mga PUJ drivers ang mikuyog sa maong rally.

Ang maong Department Order mipataas sa bayranan og pila ka pilo, tungod kay ang P200 kapin nga multahan kaniadto moabot na karon og P2 mil.

Si Rama sa dihang nahinabi sa Banat News miklaro nga dili transport strike ang ilang gihimo kun dili pagpadayag lang sa ilang kasagmuyo.

Si NADSU counsel member Eduardo Goelin miklaro nga wala nila kontrahe ang LTO kun dili pagpadangat lang sa ilang pagsupak. Matud pa niya usa sa nakapadako sa multa mao ang gitawag diha sa Department Order nga computer fee ug training fee nga unta dili na kini angay pang ihapak ngadto sa mga drayber nga nadakpan nga molukat sa ilang lisensya.

Dugang pa ni Geolin nga wala moagi og konsultasyon sa operators ug transport organization nga gihimo una pa kini gipatuman.

Apan si Aguilos sa iyang bahin miingon nga sukad kini ipatuman niadtong Marso 2 gamay na lang kaayong mga drayber ang milapas sa lagda sa trapiko.

Matud pa ni Aguilos bisan pa sa gihimong rally sa mga drayber magpabilin gihapon ang kamanduan, apan mipasalig nga ang position paper sa transport group iya kining ipaabot ngadto sa ilang ulohang buhatan.

“Mohangyo ko ninyo nga hunongon ang rally unya ipadayon ang inyong pagpamasahero kay public service man kaha ning ato? –BANAT NEWS