CEBU, Philippines – Kritikal ang kahimtang sa usa ka 12-anyos nga batan-ong lalaki human kini madasmagi og sakyanan samtang nagmaneho sa iyang sikad-sikad sa highway sa Poblacion lungsod sa Carmen niadtong Domingo sa alas 7:00 sa gabii.
Ang biktima nakaangkon og daghang mga bun-og og samad sa kalawasan ug giilang si Andro Magana, 12, molupyo sa sitio Pier barangay Poblacion.
Samtang ang nakadasmag mao ang Toyota Town Ace pickup nga gemaniho sa usa ka Diolesis Lacida Jr., 28, molupyo sa barangay Abuno lungsod sa Minglanilla.
Matud pa ni SPO1 Danilo Laurente sa Carmen Police dihang nahinabi sa Banat News paingon na mopauli ang biktima dihang nadasmagan sa nagsunod nga pickup.
Maayong pagkalabay sa biktima ug naguba ang sikad-sikad niini samtang kini nakaangkon og daghang mga samad ug pangos sa kalawasan.
Misuway unta pag-ikyas ang driver pagpasirit sa iyang sakyanan ug gibiyaan ang nagbuy-od nga biktima apan nababagan kini sa nag-checkpoint dayong kapolisan sa Danao.
Ang mga tawo nga nakasaksi mao nay mitabang sa biktima pagdala kaniya sa Danao District Hospital apan tungod sa seryosong kahimtang niini girekomendar kining ipadiretso sa tambalanan dinhi sa dakbayan sa Sugbo. (Darrel Carumba) (BANAT NEWS)