Exporters angayang tabangan

CEBU, Philippines – Gidasig ni Cebu City Councilor Arsenio Pacaña ang Department of Trade and Industry (DTI) nga mangita og dinaliang paagi pagtabang sa export industry sa rehiyon 7.

Sa samang higayon giawhag usab ni Pacaña ang nahisgutang ahensya nga mangita og tukmang solusyon pagtabang sa export industry nga makalabang sa global financial crisis.

Ang konsehal nga maoy chairman sa Committee on Trade and Commerce sa City Council miingon nga angayang paminawon sa DTI ang mga sugyot sa export industry.

Partikular na niini ang pag-restructure sa gobiyerno sa exporters’ loan o paghatag og moratorium pagbayad sa principal, o pag-refinance ba hinuon sa mga negosyante.

Paghatag sa gobiyerno og tax cut o tax break sa real estate taxes lakip na sa community tax ug pag-review sa balaud nga magprotihir sa mga exporter sa system loss charge sa kuryente.

Laing sugyot sa mga exporter mao ang paghatag og subsidy sa gobiyerno ngadto kanilang mosalmot sa mga trade fair ug uban pa.

Matud ni Pacaña nga angayang tabangan na sa gobiyerno pinaagi sa DTI ang export industry sa tunga-tungang kabisay-an tungod kay kini apektado na sa krisis.

“The domino effect of the global financial crisis which is being felt worldwide has also greatly affected the export industry in Central Visayas,” sumala ni Pacaña. (Elly Bolonos)  (BANAT NEWS)