Kaso sa dengue niminos

CEBU, Philippines - Padayon karong mikibra ang mga kaso sa dengue dinhi sa dakbayan sa Sugbu itandi sa mga nabiktima sa nahisgutang sakit sa miaging tuig.

Kini maoy gipahibawo ni Dorenda Macasucol, ang dengue coordinator sa City Health Department nga nahinabi sa Banat News.

Matud ni Macasucol nga sukad sa buwan sa Enero hangtud niadtong Marso 7, mikabat na lang sa 163 ka kaso ang natala sa ilang buhatan ug lima ang patay.

Samtang sa susamang period sa miaging tuig, ang City Health Department nakatala og 323 ka mga biktima sa dengue ug 16 niini ang nakabsan sa kinabuhi.

Sa miaging semana niingon si Macasucol nga usa lang usab ka kaso ang ilang na-monitor nga nataptan sa nahisgutang sakit ug nakagawas na sa tambalanan.

Apan taliwa niini gipadayag sa dengue coordinator nga padayon gihapong gihingusgan ang ilang anti-dengue campaign sa siyudad.

Kini sama sa pagpahigayon og pulong-pulong og mist spraying sa nagkadaiyang barangay ilabi na niadtong dunay mga kaso sa dengue.

Karong Marso 20 ang City Health Department anha mopahigayon og pulong-pulong sa Labangon ug isunod usab niini ang ubang mga barangay.

Samtang naka-schedule na usab ang pagpahigayon og mist spraying diha sa barangay Carreta karong adlawa ug isunod niini ang Lahug, Pardo, ug barangay Guadalupe.

Ang dengue coordinator padayong mipahinomdum sa mga Sugbuanon nga regular nga manglimpyo sa palibot gawas sa pagyabo sa mga napundong tubig. - BANAT NEWS