CEBU, Philippines - Hugot nga gipatuman ni Mayor Jonas Cortes ang”One School One Campus” policy nga maoy nagbukas sa kahigayonan sa paghiusa sa nabahin nga Mandaue City College(MCC).
Ang paghiusa sa MCC gikalipay sa mga magtutudlo sa maong tulunghaan nga gidumala ni Dr. Paulus Canete sa Eversely Child Hospital sa barangay Jagobiao sa maong dakbayan.
Mibanagbanag usa ang paglaum nga madawat sa mga magtutudlo sa maong tulunghaan ang P10, 824,490 milyones nga igsusuweldo sa mga kawani sa MCC nga ubos ni Canete nga gilangkoban sa 11 ka administrative officer, 12 ka mga staff, 14 ka faculty member, ug 29 ka part time teacher.
Si Dr. Elmer Repalda, presidente sa MCC Faculty Association ug professor sa maong tulunghaan mibutyag sa Banat News nga ilang gihangop ang maong tinguha sa mayor.
Hinuon si Repalda miingon nga mag-agad pa kini sa ipakanaug nga hukom sa korte alang sa pag-ila sa legal nga MCC kung ang anaa ba sa Jagobiao nga gidumala ni Canete, o ang anaa ba sa Tribunal Centro nga gidumala ni Dr. Susana Cabahug.
Si 6th District Representative Nerissa Soon-Ruiz nga nahinabi sa Banat News mipadayag usab sa iyang tinguha nga hiusahon sa usa ka school campus ang MCC.
Matud pa niya nga iyang paningkamutan nga ikapahimutang ang maong tulunghaan sa usa lamang ka luna diin tukoron ang edipisyo alang sa maong tulunghaan.
Kahinumdoman nga gitukod ni kanhi Mandaue City Mayor Thadeo Ouano ang MCC nga gitumong alang sa mga kabus nga mga tinun-an sa dakbayan. - Romeo T. Limpangog (BANAT NEWS)