Estudyante giluba sa sakop sa gang

CEBU, Philippines - Gitaupan ang tiyan sa kutsilyo sa usa ka estudyante sa Babag Night High School (BNHS)sa dakbayan sa Lapulapu nga giluba sa milabay’ng gabii didto sa gawas sa maong eskuylahan.

 Ang biktima mao si Mark Lester Inoc, 17, ulitawo, nga taga barangay Ibabao, lungsod sa Cordova usa ka tinun-an sa BNHS.

 Base sa imbestigasyon ni PO1 Juanito Gomez sa Lapulapu Police Station, nasayran nga mga alas 9:30 sa milabay’ng gabii samtang gikan sa tunghaan si Inoc uban sa iyang mga higala nagbarogbarog sa maong dapit dihang may grupo sa mga batan-on nga miduol kanila.

Unya didto nagkalalis ang usa ka sakop sa maong grupo ug sa ig-agaw sa biktima.

Apan si Inoc nga may kaisog usab, giingong maoy mipalit sa maong away dihang wala niya hibantayi nga usa sa mga kauban sa ilang kontra may gitangkil diay nga kutsilyo ug kalit kaayo kining gihansak kaniya.

Si Inoc nga walay praktis sa panagang sa dunggab, maayong pagkasabak sa tiyan busa gihatod dayon kini ngadto sa Lapulapu District Hospital apan gumikan sa katalandugon sa kahimtang, gibalhin kini ngadto sa Vicente Sotto Memorial Medical Center sa dakbayan sa Sugbo aron malibre.

Samtang ang walo ka mga batan-on nga iyang kontra dali kaayong nakapahilayo sa maong dapit ug usa niini ang nailhan ni Inoc sa ngalang "Walton" nga maoy sentro sa pag-follow up sa kapolisan karon aron masikop ang responsable sa maong hitabo.

Ang mga tigpaniid nagkanayon nga mao kini pago ug leksyon niadtong mga estudyante nga imbis mopauli dayon sa balay gikan sa eskuylahan paestambay-estambay pa unya mangita og away. - Bong Soriano (BANAT NEWS)