CEBU, Philippines - Patay ang usa ka lalaki ug kritikal usab ang tawong gikaaway niini niadtong sa pasado alas-4 kagahapon sa buntag sa dalan Saturn, sitio Caduloy barangay Tisa ning dakbayan.
Si Joven Bucao Pascual, 31, taga syudad sa Mandaue apan lumad nga lumolupyo sa nahisgutang lugar giingong gidunggab-patay ni Jayme Alvares Bucao kinsa kritikal usab ang kahimtang tungod sa samad sa ulo human hampaka og bato ang ulo.
Sa imbestigasyon sa kapolisan, ang biktima nakig-inom uban sa iyang mga higala sa maong lugar dihang miabot ang suspetsado ug miduol dayong diretso og duslak sa biktima sa walay daghang pangutana.
Bisan sa naangkong mga samad dinunggaban sa iyang tiyan nakabalos kini dihang nakapunit og bato dayong hampak niini sa ulo sa suspek kinsa nawad-an og panimuot.
Gisuwayan unta og dala sa Cebu City Medical Center si Pascual apan gideklarar kining dead on arrival.
Nakuha sa kapolisan gikan sa kamot sa suspetsado mao ang “pinote” nga adunay gitas-ong 23 pulgadas nga maoy gigamit niini sa pagdunggab kang Pascual.
Ang suspetsado kritikal pa ang kahimtang sa mao gihapong tambalanan samtang gisubay na sa kapolisan ang motibo sa maong krimen. - Lesley Caminade (BANAT NEWS)