CEBU, Philippines - Gidayeg ni Provincial Board member Juan Bolo ang Department of Environment and Natural Resources kun DENR tungod sa paghatag og trabaho sa nga natangtang sa trabaho tungod sa global financial crisis.
Matud pa ni Bolo sa napasar nga resolusyon, dako kaayo og matabang ang programa sa DENR nga gitawag og Comprehensive Livelihood and Emergency Program kun CLEEP ngadto sa mga terminated workers sa nagkadaiyang kompanya.
Kini tungod kay moabot man sa 111,536 ang mga trabahante ang madawat sa maong programa nga pagalangkuban sa Upland Development Program ug "Bantay Gubat" project.
Nasayran nga ang 52,425 ka mga upland workers gitahasan pagpananum og forest and fruit tree seedlings samtang ang 59,111 ka mga trabahante ubos sa Bantay Gubat himuong mga forest guards.
Si Bolo nagkanayon nga ang maong programa makabenepisyo usab sa mga pamilya sa mga nawagtangan sa trabaho tungod kay gitabangan man sa DENR.
Gawas niini, makatabang pa ang maong mga trabahante sa pagpreserbar sa kalikupan tungod kay giatiman niini ang mga kakahuyan.
Gipanghinaut sa provincial board member nga ang ubang mga government agencies mosunod sa programa sa DENR. - Chester Abadilla (BANAT NEWS)