CEBU, Philippines - Gibaslan og pusil patay ang usa ka batan-ong lalaki pinaagi sa pagsaka sa kusina sa balay niini ug gipusil samtang nagluto og panihapon sa barangay Looc Norte lungsod sa Asturias niadtong Martes sa alas 7 sa gabii.
Ang biktima mao si Manuel Baton, 25, dunay kapuyo ug molupyo sa nahisgutang lugar samtang ang suspek mao si Pablito Napoles, 29, minyo ug molupyo sa barangay Cantuod lungsod sa Balamban.
Matud ni SPO1 Dennis Nocus sa Asturias Police Station dihang nahinabi sa Banat News subay sa inisyal nga imbestigasyon personal nga kasungian ang motibo sa maong panghitabo.
Kini human ma-establisar sa kapolisan nga ang biktima ug suspek una kining nagkapinusilay didto sa Sitio Community, barangay San Isidro niadtong 2005 diin hapit mamatay ang suspek human makaangkon og samad pinusilan sa tiyan.
Gituohan nga nanimawos ang suspek ngadto sa biktima ug samtang nagluto sa panihapon ang biktima sa kusina sa ilang balay wala kini makabantay nga misekreto og saka ang suspek ug dayong pusil sa makadaghang higayon hangtod nga natumba ug namatay human makaangkon og dili mominos lima ka samad pinusilan sa kalawasan ang biktima ug wala na madala pa sa tambalanan.
Ang suspek daling misibat human sa hitabo ug padayon pa karong gipangita sa kapolisan.
Gidugang ni SPO1 Nocus nga nakahipos sila og impormasiyon nga ang biktima misibat na didto sa Masbate. (Darrel A. Carumba) (BANAT NEWS)