CEBU, Philippines - Gibasura sa Cebu City Market Authority ang hangyo sa mga stallholders sa Tabo-an Public Market nga lugwayan hangtod sa Abril 30 ang pag-renew sa ilang kontrata.
Hinuon miingon si City Market Administrator Racquel Bohol-Arce nga ang mga sakop sa market authority mihatag gihapon og pipila ka adlaw nga lugway sa mga vendors.
Kagahapon ra unta kutob ang extension nga gihatag sa mga stallholders diha sa Tabo-an Public Market ug ideklarar na nga bakante ang ilang mga stalls.
Apan matud ni Arce nga ilang nasabutan nga hatagan ang mga vendors kutob sa Marso 31 pagtuman sa mga rekisitos pag-renew sa ilang contract of lease.
Gipadayag sa market administrator nga dili na mohatag og laing extension ang market authority ngadto sa kapin sa 150 ka mga stallholders human sa maong lugway.
“Kun dili gyud sila maka-renew sa kontrata, madeklarar gyud na nga vacant ang ilang mga stalls, once nga ma-declare og vacant, isubasta na siya,” sumala ni Arce.
Ang Tabo-an maoy gihulagway ni Arce nga labing problemado nga satellite market tungod sa kadaghang mga stallholders nga wala maka-renew sa contract of lease.
Gituohan nga naalkanse ang mga stallholders sa ilang pagpaninda tungod usab sa giingong kagamay na lang sa mangompra diha sa Taboan.
Kini tungod kay ang nahisgutang merkado publiko gikataho nga gihimo nang lublobanan sa mga isnatser, kawatan ug uban pang badlongon sa katilingban.
Gitataw hinuon sa market administrator nga ila nang gisugdan pagpangita og solusyon ang maong problema pinaagi sa pagpapahawa sa mga namuyo sa merkado. (BANAT NEWS)