CEBU, Philippines - Giaprobahan sa Sangguniang Panlalawigan sa Sugbu ang resolusyon sa konseho sa lungsod sa Santander nga nagdeklarar sa tibuok lungsod ubos sa state of calamity.
Kini human mangaguba ang mga kadalanan, kabalayan, water system ug uban pang imprastraktura sa lungsod nga nakasinati og grabeng mga pagbaha sa miaging bulan diin tulo usab ka mga kasikbit nga lungsod ang lakip sa naapektahan.
Ang Santander mahimo nga mogamit sa ilang calamity fund aron makapalit og mga materyales pag-repair sa mga nangagubang kadalanan ug imprastraktura human tuguti sa Hunta Probinsyal ang pag-release sa nahisgutang pundo.
Si Sonny Gador, secretary ni Mayor Wilson Wenceslao dihang nahinabi sa Banat News nagkanayon nga gisugdan na og apod ang budget sa calamity fund sa lima ka barangay sa coastal area nga maoy naapektuhan.
Ang maong mga barangay mao ang Talisay, Liloan, Poblacion, Looc, ug Pasil.
Matud ni Gador nga gipauna gyud sa pagpatrabaho sa mayor ang nabarang creek sa maong mga barangay sanglit natabunan sa daghang bato, unya gisunod dayon ang pagtrabaho sa nangagubang karsada ug ang water system.
Mitataw si Gador ang water system gikan sa bukirang barangay nasugdan na usab og trabaho. (Rey Pasaporte) (BANAT NEWS)