CEBU, Philippines - Nangayo og pasaylo si Cebu City Administrator Francisco “Bimbo” Fernandez ngadto sa pamilyang Burden tungod sa iyang gipasalig niini.
Kini may kalabutan sa unang gipahibalo ni Fernandez nga dunay himuong “drastic move” si Mayor Tomas Osmeña sa mga organizer sa Miss Cebu 2009.
Kini human mitumaw ang kontrobersiya sa texters’ choice award dihang lain ang gihatagan niini ug dili ang tinuod nga midaug nga si Kimberley Therese Burden.
Matud ni Fernandez nga siya mismo nagtuo nga ang himuong lakang sa mayor mopabor ngadto sa pamilyang Burden nga naargabyado.
Apan sa iya usab nga kasurpresa nga si Osmeña didto midapig sa mga pageant organizer ug sa midaog sa Miss Cebu 2009.
Giklaro ni Fernandez nga ang iyang papel diha sa City Hall mao lang ang pagpatuman og mga palisiya ug dili ang paghimo niini.
Giangkon sa city administrator nga siya dunay mga rekomendasyon nga sagupon sa mayor apan dunay uban nga ibasura usab ni Osmeña.
“Of course I’m sorry what happened sa mga Burden but I think my position is very clear that I don’t make policies,” sumala ni Fernandez.
Nakasabot hinuon ang inahan ni Kimberley nga si Dr. Rowena Burden sa habig ni Fernandez ug wala kini mahiubos sa city administrator.
Gani miingon ang doktora nga siya naluoy usab kang Fernandez tungod sa giingong kasensiro niini nga nakighinabi kanila kaniadto. (BANAT NEWS)