Rama di gyud suportahan

CEBU, Philippines - Supak gyud ug dili mosuporta kang Bise Mayor Michael Rama ang pipila ka mga kapitan nga namirma sa manifesto kun mao kini iduso nga kandidato sa Bando Osmeña Pundok Kauswagan (BOPK) pagka-mayor sa 2010 nga eleksiyon hulip kang Mayor Tomas Osmeña.

Hinoon gipadayag ni Kapitan Nilo Tariman sa Pit-os nga maoy usa sa lima ka mga kapitan nga nag-organize sa maong manifesto wala siya'y personal nga problema ngadto kang   Rama ug mipasabot nga igo lang silang naghatag og opsiyon ni   Osmeña aron dunay   kapilian ang partido nga ituboy sa umaabot piniliay.

Apan giklaro nang daan ni Tariman sa dihang nahinabi sa Banat News nga bisan pa og si   Rama mao gyuy pormal nga ituboy ni Osmeña nga maoy kandidato sa BOPK pagka- mayor dili gyud siya mopaluyo niini tungod kay matud niya kaniadto pa siya nga dili pabor ni Rama.

Gipadayag niya nga wala na kinahanglana ang planong pagpakigtagbo ni Rama ngadto nila tungod kay wala man sila'y angay hiloton.

Apan si Kapitan Pancho Ramirez Sr. sa Sto. Niño mihangop dayon sa lakang ni Rama nga pagpakigtagbo nilang mga kapitan nga namirma sa maong manifesto aron masulbad ang maong problema mentras sayo pa.

Si Ramirez miangkon nga siya ingon man si Tariman ug laing tulo pa ka mga kapitan sa BOPK   nagkasabot nga moduso og manifesto nga gipapirmahan sa ilang mga kaubanan aron iduso ngadto ni Osmeña nga magpabor sa del Mar-Osmeña tandem.

Si Ramirez mipadayag hinuon nga iyang paluyohan ug respetuhan ang bisan unsang desisyon nga makab-ot ni Osmeña alang sa ilang partido. (BANAT NEWS)