Baquerfo wala posasi sa PNP

CEBU, Philippines - Gibuhian na sa kapolisan si Tudela Mayor Rogelio Baquerfo Sr. kagahapon sa alas 11 pasado sa buntag human makabutang og P40 mil nga piyansa   human malutsi’g warrant of arrest gikan sa Sandiganbayan niadtong Martes sa buntag tungod sa kasong malversation of public property.

Si   Baquerfo uban sa iyang abogado nga si Atty. Noel Archival ug mga polis sayong miadto   ni Regional Trial Court Executive Judge Meinrado Paredes.

Human gipabuhian sa korte, si   Baquerfo mipauli gilayon kini ngadto sa ilang panimalay sa Tudela aron usab sa pagpawala sa mga kabalaka sa iyang mga supporters.

Si Atty. Archival nagkanayon nga ang iyang kliyente   mopadayon sa pag-serbisyo   katawhan sa lungsod sa Tudela bisan pa man sa maong hitabo nga gihulagway niining “baseless” case.

Si Baquerfo mitataw nga walay basehanan ang kasong iyang giatubang sa Sandiganbayan tungod kay ang mga semento nga giingon sa kaso maisip nga ilis sa munisipyo sa personal nga butang nga gigamit sa usa ka proyekto nga dugay naaprobahan og pundo alang sa pagpalit niini.

Samtang si Cebu Provincial Police Office director Sr. Supt. Carmelo Valmoria mitataw nga wala posasi si Baquerfo niadtong Martes tungod kay boluntaryo siyang mitahan sa iyang kaugalingon sa pagkasayod nga adunay warrant nga naabot tungod sa kasong iyang giatubang sa Sandiganbayan.

Gitataw usab niya nga walay special treatment nga gihatag sa mayor. Gani gipahigda kini sa buhatan sa Provincial Intelligence Branch (PIB) nga mao usab ang gipahigdaan sa lider sa mga rebelde nga si Ramon Patriarca. – BANAT NEWS