Sikyu nag-uniporme'g PNP gidakop

CEBU, Philippines - Usa ka security guard nadakpan sa kapolisan sa dakbayan sa Sugbu human nagsul-ob og t-shirt nga uniporme sa polis ingon man karsones nga blue camouflage kagahapong adlawa diha sa may dalan Colon  eskina V. Gullas, barangay Pari-an.

Si Ian Pacaña, guwardiya sa Cebu City Alliance Church ug taga Junquera ning dakbayan nadakpan sa mga traffic police nga sila si PO3 Alan Magalso ug PO2 Edgar Baton samtang nag-roving sa dalan Colon kagahapon sa alas 9:30 sa buntag.

Si PO3 Magalso nga nahinabi sa mga tigbalita nagkanayon nga samtang nag-roving sila ni PO2 Baton ilang nasigpatan si Pacaña nga nagsakay’g bisiklita nga nagsul-ob sa T-shirt nga itom nga adunay imprenta sa Regional Mobile Group (RMG) ug “Bagwis” batch 2002.

Gipangutana si Pacaña kun polis ba kini apan nasutang usa lang kini ka sikyu dihang gipangitaan og ID.

 Gipadayag niini nga nakuryuso lang siya sa nilihukan ni Pacaña tungod kay bag-o pang gimando ni Acting Regional Office Director Chief Supt. Federico Terte nga ipadakop gyud kadtong mga tawong dili polis nga magsul-ob og uniporme sa PNP human usab sa nahitabong pagpanulis sa Fooda Savers Mart niadtong milabay’ng Lunes sa mga tulisan nga nagsul-ob og sapot sa polis.

Si Pacaña gi-turn-over sa Pari-an Police Station ug kagahapon sa hapon gipasaka ang kasong kalapasan sa Article 179 sa Revised Penal Code (RPC) nga naila nga magsilot   niadtong mga tawo nga mogamit sa mga uniporme sa kapolisan o militar apan dili sakop niini .

Si Pacaña nga nahinabi sa mga tigbalita miingon nga ang maong uniporme hinatag sa iyang kumpareng polis nga si PO3 Philip Rama kinsa nadestino diha sa Police Regional Office.

Matud pa niini nga niadtong milabay’ng duha ka semana gihatag kini ni PO3 Rama human usab nakit-an siyang nanglimpyo nga hugaw kaayo ang iyang karsones.

Si Sr. Insp. Bonifacio Garciano ang hepe sa Parian Police Station nagkanayon nga magsilbi kining warning niadtong mga tawo nga mosul-ob sa mga uniporme sa mga polis. – BANAT NEWS