Baroto Regatta ipahigayon sa Talisay
CEBU, Philippines - Ang kagamhanan sa dakbayan sa Talisay uban sa pagtambayayong sa City-Fisheries Aquatic Resource Management Council (C-FARMC) gitakdang mopahigayon og Baroto Regatta atol sa ika-64 nga Landing Celebration sa siyudad karong Marso 26, 2009.
Ang maong kalihokan nga sugdan sa alas 9:00 sa buntag adto manukad sa Tourist Seaside Hotel isip assembly area diha sa barangay Poblacion, Talisay City.
Ang unang Baroto Regatta sa dakbayan sa Talisay gilusad niadtong Oktobre 12, 2008 atol sa birthday ni Gobernador Gwendolyn Garcia nga gipasiugdahan ni kanhi Customs District Collector David “Boy” Odilao, ang tsirman sa C-FARMC.
Ang Baroto Regatta, usa ka lumba sa sakayan nga gamitan lang og layag.
Niadtong miaging Oktobre sa gipahigayon ang Baroto Regatta dili maayo ang panahon ug dagko kaayo ang mga bawod sa dagat.
Ila kining ibalhin sa buwan sa Marso nga usa ka summer month kay kalma kaayo ang dagat ug gagmay ang mga bawod.
Sa paglusad sa maong kalihukan sa miaging tuig, taga Talisay lang ang gitugotan nga moapil niini apan niining higayona mahimo nang makasalmot ang taga ubang dapit sa lalawigan sa Sugbo.
Sa matag sakayan, tugotang duha ka tawo ang mosakay niini ug mobayad sila og P3,000 isip registration fee.
Ang makadaog sa maong lumba , makadawat og P50,000 first prize, P40 mil sa 2nd prize, P30 mil, P20 mil, P10 mil sa 3rd, 4th ug 5th place.
Samtang ang 6th ngadto sa 10th place, makadawat og tagsa ka sakong bugas.
Ang 1st ngadto sa 3rd place, makadawat usab og trophy samtang ang 4th ug 5th place makadawat usab og mga medalya. – BANAT NEWS
- Latest
- Trending
