CEBU, Philippines - Pormal nang milingkod ang bag-ong OIC District Commander nga si Captain Hernando Anonas sa Customs Police sa Cebu Customs District Office isip hulip kang Captain Alfonso Abbariao ang kanhing district commander.
Atol sa turn over sa miaging Biyernes, gipadayag ni Abbariao ang iyang kasagmuyo bahin sa kalambuan sa kasong iyang giatubang ngadto sa Intelligence, Investigation and Prosecution Division (IIPD) sa BOC Manila.
Kahinumdoman nga si Abbariao gipasakaan og kasong administratiba uban sa mga Customs police ug personnel sa Customs Port of Mactan dihang gi-release niini ang barkong Philippine Dream nga walay pagtugot sa mga kadagkuan sa Customs Cebu.
Ang maong barko may bayronon pa nga balig P12 milyones ngadto sa Customs Cebu.
Ang unom ka mga kawani sa Customs Mactan gisuspenso sulod sa unom ka bulan, apan si Abbariao miluwat og motion for reinvestigation ug reconsideration sa maong kaso.
Apan ang maong motion gibasura sa IIPD ug si BOC Commissioner Napoleon "Boy" Morales mao mismo ang miluwat sa maong releave order kang Abbariao.
Samtang si Anonas nga maoy mihulip kang Abbariao misaad nga ipadayon niini ang mga kalihokan nga nabiyaan ni Abbariao. – BANAT NEWS