Drayber sa PUJ's paandamon og sensilyong panukli

CEBU, Philippines - Gitambagan sa Land Transportation Franchising and Regulatory Board (LTFRB) ang mga pasahero ug drayber nga mag-andam gyud og sinsilyo aron duna kini ikasukli paglikay sa mga motumaw nga lalis.

Si LTFRB-7 director Romulo Bernardez miluwat ning maong pahimangno gumikan sa pagpatuman niadtong Lunes sa bag-ong P6.50 nga minimum nga pletihan sa pampublikong sakyanan dinhi sa dakbayan ug Metro Cebu ug sa kinatibuk-ang Central Visayas.

Gikabalak-an nga makahatag kini og gamay'ng lalis sa habig sa mga PUJ drayber ug sa mga sumasakay ilabina kay nihit na kaayo karun ang tag 25 sentimos nga sinsilyo.

Gitambagan usab ni Bernardez ang mga sumasakay ilabi na ang mga tinun-an nga kun dunay reklamo batok sa mga drayber modiretso lang og report sa ilang buhatan o ba kaha sa buhatan sa Land Transportation Office (LTO-7.

Kini aron ilang mahatagan og dinaliang aksyon ug mapahamtangan og silot kadtong mga PUJ drayber nga wala motuman sa bag-ong P6.50 nga minimum nga pletihan.

Pipila lamang sa mga PUJ drayber ang manukli og 50 sentimos ngadto sa ilang mga pasahero tungod kay kun mohatag ang usa ka pasahero og tibuok P10 suklian lang gihapon sila og P3. – BANAT NEWS