Bacquerfo gisikop

CEBU, Philippines - Si Mayor Rogelio Bacquerfo sa lungsod sa Tudela, Isla sa Camotes   giposasan sa kapolisan kagahapon sa alas 11:45 sa buntag sulod sa iyang buhatan sa munisipyo sa nahisgutang lungsod human nalutsan og warrant of arrest gikan sa Sandiganbayan gumikan sa kasong malversation of public property.

Ang kaso gipasaka kini ni Mayor Demetrio Granada niadtong 2004 human matud pa si Bacquerfo midala ngadto sa ilang panimalay sa 350 ka sakong semento nga gipanag-iya sa munisipyo sa dihang gipalit kini sa naulahii samtang kini pay milingkod nga mayor.

Matud pa ni Granada nga nahinabi sa Banat News nga sila si SPO3 Edison Torres ug PO1 Glen Abapo maoy misikop kang   Bacquerfo kagahapon sa buntag human nalutsan og warrant of arrest nga gi-isyu ni Sandiganbayan 5th Division Associate Justice Maria Christina Cortes Estrada.

Gibutyag niya nga sa dihang ang korte mipabor kaniya nga maoy migawas nga mananaog sa eleksiyon sa 2004 miduso dayon siya og demand letter ngadto kang Bacquerfo sa pag-uli sa 350 ka sakong semento.

Apan   nagmagahi kini pagsanong hinungdan nga miduso siya’g reklamo sa buhatan sa Ombudsman niadtong 2004 nga mipasaka sa kaso ngadto sa Sandiganbayan.

Si Mayor Bacquerfo miduso og motion for reconsideration apan gibasura kini hinungdan nga nalutsan kini og warrant of arrest.

Gipasabot ni Granada nga lig-on ang iyang mga ebidensya sa maong kaso gumikan usab sa mga testigos nga sila si Angelita Roble ang treasurer sa munisipyo ug drayber nga si Leroy Laguna nga maoy nag-deliver sa mga semento ngadto sa balay ni Bacquerfo.

Nasagmuyo usab siya sa kapolisan sa ilang lungsod gumikan kay bias kini human wala gilayon dakpa sa dihang naabot ang warrant kagahapon sa buntag ug sama sa gitagoan pa niini ang mayor.

Si Atty. Noel Archival, abogado ni Bacquerfo nga nahinabi sa Balitang Bisdak sa GMA News nagkanayon nga iya pang sutaon kun tinuoray ba ang maong warrant of arrest o dili ba kini himo-himo lang.

Giklaro ni Archival nga naka-andam na og kuwarta nga P150 mil si Bacquerfo aron ilang gamiton sa pagbutang og piyansa sa korte. – BANAT NEWS