CEBU, Philippines - Usa ka giingong ex-convict ug bag-ohay pa nga nakagawas gikan sa bilanggoan nakit-ang patay ug gituohang gi-salvage diha sa bukirang bahin sa sitio Kuros-kuros, barangay Cansumoroy, lungsod sa Balamban kagahapon sa buntag.
Ang biktima mao si Suzimo Sohot, alyas Titing, 21, ug molupyo sa White Hills sitio Banawa sa barangay Guadalupe siyudad sa Sugbo apan lumad sa Mindanao.
Si SPO3 Arvi Banate ang imbestigador sa maong kaso sa pakighinabi sa Banat News nagkanayon nga base sa ilang pasiunang paghiling sa lawas sa biktima nakaangkon kini og 31 ka samad dinunggaban.
Matud pa ni Banate pormang trayanggulo ang mga gagmay’ng samad sa kalawasan niini nga gituohang agi sa “tres kantos” nga sagad ginama sa limbas nga gihaitan.
Ang kapolisan nagkanayon nga naputos og mga samad dinunggaban sa kalawasan ang biktima nga nakaingon sa hinanali niining kamatayon ug gituohang sa laing lugar kini gipatay ug diha lang gilabay tungod kay walay lama sa mga dugo sa dapit ug wala mangatandog ang mga tanom timaan nga walay komosyon nga nahitabo.
Ang mga residente diha sa dapit wala makaila sa patayng lawas ug mitawag nalang sa kapolisan kabahin niini.
Sa pag-responde na sa kapulisan una pa mailhi ang biktima pinaagi usab sa certificate of discharge order sa Cebu City Jail nga may petsang Marso 7, wala pa matino sa kapolisan atol ning pagsulat sa balita kun nganong na-discharge si Sohot.
Matud ni PO2 Hannibal Larida sa Balamban Police Station sa dihang nahinabi sa Banat News nga gawas sa samad dinunggaban gitaptapan usab og masking tape ang baba sa biktima.
Ang maong dokumento gilukot og maayo ug gihikot sa liston sa hawak sa iyang basketball shorts.
Sa gihimong pagsusi ni Banate sa Homicide Section sa Cebu City Police Office nasuta nga si Sohot gikasuhan niadtong Enero 7 sa kasong frustrated homicide. – BANAT NEWS