Tomas midaot

CEBU, Philippines - Gisugat sa gatusang mga supporters si Mayor Tomas Osmeña dinhi sa dakbayan human sa upat ka buwan nga pagpatambal didto sa Estados Unidos. Dayag ang masakiton nga dagway sa mayor diin namaga ug nangitom ang eye bags ug midaot ang lawas niini.

Ang uban kanila mituyo pa og paupaw sa ilang mga buhok agi og pagpakita sa ilang simpatiya, ang uban usab nagsuot og kolor yellow nga mga t-shirts.

Diha palang sa daplin sa dalan gikan sa dakbayan sa Mandaue padulong sa dakbayan sa Sugbu gigastuhan gyud sa dakbayan ang pagbutang og mga yellow ribbons.

Kini nakapalipay sa mayor ug sa kapikas niining si Margot Osmeña kinsa tibuok proseso sa pagpatambal sa mayor misuporta sa iyang bana.

Ang mayor gipaubos sa pito ka cycle sa chemotherapy sa Amerika human usab masuta nga kini dunay urinary bladder cancer.

Matud ni Osmeña nga gawas nga bugnaw ang panahon sa Estados Unidos gimingaw na usab siya sa Sugbu maong nakahukom sila sa pagpauli, kagahapon pormal nang mibalik sa iyang official function ang mayor diha sa city hall.

Gipaabot nga mobalik ang mayor ngadto sa Amerika karong Marso 30 alang sa gitakdang pagpaubos kaniya sa laing operasyon.

Ang mayor gi-opawan tungod sa chemotherapy sessions ug nanglagom ug namaga ang iyang eye bags.

Uban kang Osmeña sa iyang pagpauli ang iyang asawa nga si Margot nga nagmaya usab sa ilang paghiabot sa dakbayan ug gisugat sa mga opisyal sa siyudad diha sa airport nga sila si North District Rep. Raul del Mar, City Administrator Francisco Fernandez ug pipila ka mga konsehal.

Midiretso gilayon ang magtiayon ngadto sa ilang pinuy-anan sa barangay Guadalupe human motugpa ang abyon nga ilang gisakyan diha sa Mactan International Airport.

Dugang nakasurpresa sa mayor pag-abot sa ilang panimalay ang mayor gisugat usab sa paghatag og luhong sakyanan nga gikan sa Bigfoot Entertainment nga gikalipay usab niini.

Diha sa unang adlaw sa pagbalik sa mayor sa city hall, kini subling mipasalig sa mga senior citizen nga ihatag gyud karong tuiga ang ilang P1,000 nga pinaskuhan ug P1,000 nga birthday gift, apan di na kini tagi-tagihon kundili lump sum kon bulto ang paghatag niini.

Gawas sa nahauna nang rason sa pagbalik sa mayor dinhi, buot usab niyang matapos ang iyang nasugdang mga pakig-negosasyon sa mga investors diha sa South Reclamation Project.

Gihikling una sa mayor kagahapon nga hisgutan ang isyu kabahin sa manifesto sa mga barangay kapitan batok sa pagsuporta kang Vice Mayor Michael Rama ug Augustus Young alang sa 2010 elections,apan kini mipadayag nang daan nga di niya kini tagdon. – BANAT NEWS