'Namago' sa bulangan gipusil patay

CEBU, Philippines – Usa ka lalaki ang gipusil patay sa iyang kasugal diha sa sulod sa bulangan sa Medellin Amusement Center Incorporated sa Barangay Luy-a sa lungsod sa Medellin niadtong Domingo sa hapon.

Giila sa kapolisan ang biktima mao si Frankie Cudiera, residente sa barangay Poblacion sa samang lungsod samtang giila usab ang suspek mao si Kevin Invento, alyas Kem, 25, ug residente sa sitio Lakdon, sa barangay Dayhagon sa mao gihapong lungsod.

Sa imbestigasyon sa kapolisan nasutang naglingkod ang biktima diha sa bangko dihang giduol sa suspek ug mipabuto og .357 revolver diha sa yuta atubangan sa biktima nga walay igong hinungdan.

Ang biktima gikatahong mikapyot sa luyo sa suspek samtang naninguhang mailog ang armas apan gipusil siya diha sa iyang mga tiil hinungdan nga natagak kini sa yuta.

Ang suspek nakahigayon pagpusil sa dughan sa naghayang na nga biktima samtang ang ubang nanugal nakatawag dayon og polis.

Usa ka polis nga giilang si PO3 Jesus Suan, sakop sa Tabogon police miabot sa crime scene ug miaresto sa suspek ug nakuha ang nahisgutang armas nga nasutang paltik ug may sulod nga lima ka basiyo ug usa ka buhing bala sa tambor niini.

Ang biktima gidala sa Verallo Medical Center sa Bogo City apan si Dr. Kevin Yap mideklarar kaniyang dead on arrival.

Nasuta sa kapolisan nga may kalabutan sa pusta ang motibo sa pagpamusil human masayri sa kapolisan nga niadtong Marso 1 midaog ang suspek sa bulang apan gipago (wala bayri) sa biktima ang suspek sa daog niini. –BANAT NEWS