CEBU, Philippines - Giawhag sa mga sakop sa hunta probinsiyal ang kapolisan sa kalungsoran nga modestino og polis sa mga pribado ug pampublikong tulunghaan sa ilang lugar.
Kini aron mabantayan ang mga kabataan gikan sa mga kriminal nga mamiktima kanila sama sa mga kidnaper.
Si Provincial board member Juan Bolo nagkanayon sa iyang gipasar nga resulosyon nga dili siya buot nga may mga bata pa sa probinsiya sa Sugbu nga mabiktima sa kidnapping.
Nasayran nga niadtong nakalabay nga bulan, usa ka 5 anyos nga batang tinun-an sa kinder sa Mambaling Elementary School ang gidagit sa usa ka tomboyon nga babaye apan giuli ra usab kini human sa upat ka adlaw.
Didto usab sa probinsiya sa Bulacan, usa usab ka batang babaye ang gidagit sa nagpailang dentista gikan sa usa ka eskuylahan ug gipugos sa pagpasakay sa Delica Van.
Matud pa ni Bolo nga ang maong kalihukan mugna sa mga organized crime group nga posibling mopahigayon og operasyon dinhi sa lalawigan sa Sugbu.
Kini ang hinungdan nga gipanawagan ni Bolo ang kapolisan nga butangan og polis o kaha monitoron ang mga tulunghaan aron mahanaw ang kabalaka sa mga ginikanan nga mabiktima sa kidnapping ang ilang mga anak.
Gawas sa kapolisan, si Bolo miawhag usab sa mga barangay officials nga motabang sa kapolisan pinaagi sa pagbutang og dugang mga barangay tanod nga mobantay sa mga bata sa paggawas pa lamang gikan sa eskuylahan.