Namirma sa manifesto nagmahay

CEBU, Philippines -  Wala pa gani maabti og usa ka semana human mipahibalo ang pipila ka mga kapitan nga di nila suportahan si Bise Mayor Michael Rama pagkamayor sa dakbayan, duna nay pipila sa mipirma sa manifesto ang giingong nagmahay sa ilang gihimo.

Si Basak-San Nicolas barangay captain George Rama mibutyag nga nakadawat siya og mga text messages gikan sa namirmang kapitan nga nangayo og pasaylo ug nagmahay.

“Ang uban ni-text nako nangayo og pasaylo ug nagmahay kuno sila nganong nipirma, ang uban nanawag gyud nako unya miingon nga sorry,” sumala ni Rama

Ang manifesto gikatahong pagpadayag sa ilang di pagsuporta kang Rama ug sa pares niini nga si Joy Agustus Young pagka-bise mayor sa 2010 elections ug miduso hinuon kang North District Rep. Raul del Mar isip mayor ug Mayor Tomas Osmeña pagka-bise mayor.

Nagtuo si George Rama nga gilingla lang ang iyang mga kauban sa nagpasiugda sa manifesto tungod kay giingong gipatuo niining gikan sa taas (Tomas) ang kamanduan.

Ang pamahayag ni kapitan Rama gidasunan ni ABC president Eugenio “Jingjing” Faelnar nga nakadawat usab sa text messages.

Sila si Rama ug Faelnar nagdumili hinuon pagbutyag sa pangalan sa mga kapitan nga giingong nakaamgo sa pagpirma sa manifesto.

Sa iyang bahin, gikataw-an lang ni Pit-os barangay captain Nilo Tariman ang gipahibawong kalamboan nilang Rama ug Faelnar.

Nidugang ang kapitan nga ilang tapuson ang signature campaign karong adlawa kung wala nay laing mopirma sa kontrobersyal nga manifesto ug ilaha kining itunol kang Osmeña atol sa pag-abot niini.