CEBU, Philippines - Gibana-banang P100 milyones ang danyos sa gidarong gasang diha sa Lagundi Reef nga usa ka fish sanctuary sa dakbayan sa Talisay nga gidaro sa usa ka barko niadtong adlaw’ng Huwebes.
Si Owen Algoso ang legal officer nagkanayon nga kasong kalapasan sa ordinansa sa siyudad ug reckless imprudence resulting to damage to property ang pasiunang gipasaka batok sa ship captain sa MV United Majuro nga si Chen Guang Ming.
Matud ni Algoso halos katunga sa coral garden nga may gilapdong usa ka ektarya ang naguba sa barko, ug gani di makwenta kun ang basehan sa kwarta ang nadaot nga gasang tungod kay dili kini binuhat sa tawo iya kini sa kinaiyahan.
Ang siyudad ang nagsiksik og mga balaudnong nasyonal kabahin sa kalikupan ug marine life nga matukma sa nahisgutang kalapasan aron madugang nila og patong sa kaso ni Ming.
Si Algoso midugang nga misuwat siya kagahapon ngadto sa Bureau of Customs ug sa immigration nga moluwat og “hold departure order” batok sa kapitan ug sa barko hangtud nga mahuman ang kaso.
Si Ming ang nadetiner pa karon sa Talisay City detention cell. Sa laing bahin, si Konsehal Shirley Belleza ang tsirman sa Tourism Heritage Council mibutyag nga nasagmuyo siya sa maong hitabo tungod kay nangandam na ang siyudad sa re-launching sa nahisgutang fish sanctuary karong Marso 25, 2009.
Si Belleza midugang nga adunay mitawag kaniya kagahapon sa buntag nga Chinese attaché ug nangutana kabahin sa kahimtang sa kapitan ug mga crew sa barko.
Ang barko ang mihawa na diha sa Lagundi Reef ug naa kini magpundo sa barangay Pooc, Talisay. - Brenda Batuto (BANAT NEWS)