Bana sa 'asawa' sa Australian mokiha

CEBU, Philippines - Pasakaan gyud og kasong bigamy sa bana ang iyang asawang nakigminyo usab og Australian human niya mapamatud-i sa kapolisan nga kaduha kini gikasal sa simbahan sa naglain-laing tuig ug dapit.

Matud pa ni Chief Inspector George Ylanan sa Investigation and Detective Management Branch sa Cebu City Police Office nga ang unang bana nga si Felipe Demos Jr. midangop kaniya ug nangayo og tambag kung unsay angay’ng buhaton mahitungod sa iyang kanhi asawang si Carin Kenny nga naminyo sa Australian nga si Sean Paul Kenney.

Matud pa ni Ylanan nga nadiskubrehan ni Demos nga nagpakasal si Carin kang Kenny niadtong bulan sa Marso 13, 2008 sa Consolacion Parish Church kini bisan kasado kini kang Demos niadtong bulan sa Abril 12, 2000 sa Leyte.

Kahinumduman nga si Sean Paul Kenny midangop sa IDMB aron magpatabang tungod kay gikidnap ang iyang asawang si Carin, apan kini nasutang bakak ug hinimo-himo ra ni Carin ug uyab nga usa ka taxi driver nga si Jimmy Amen.

Apan ang kaso na-dismiss tungod kay wala mosumitir og affidavit si Sean Paul Kenny batok sa asawang si Carin ug ni Amen.

Apan bisan pa man kasuhan gihapon nila si Amen og illegal possession of firearm ug possession of illegal drugs, nga ilang nakuha atol sa pagdakop kanila niadtong adlaw’ng Miyerkules.

Dugang pa ni Ylanan, si Amen usa sa mga pushers sa Villagonzalo sa barangay Tejero. Ang bana ni Carin nga si Demos mitug-an kang Ylanan nga “nabuang” na sa drugas ang iyang asawa maong magsige og kuyog kang Amen.

 Matud pa ni Ylanan mohatag sila og kopya sa kaso ug sa imbestigasyon batok kang Carin ngadto sa Bureau of Immigration and Deportation (BID) ug Department of Foreign Affairs (DFA) aron mabutang kini sa watch list aron di makagawas sa nasud.  - Lesley Caminade (BANAT NEWS)