7-anyos gilugos

CEBU, Philippines - Nagkadugo na nga nipauli ug nagbitbit sa iyang underwear ang usa ka 7-anyos nga batang babaye’g tinun-an sa grade one human kini gilugos sa usa ka traysikad drayber nga maoy nikuha kaniya sa eskuwelahan.

Matud pa sa bata imbes sa balay siya dad-a adto na hinuon siya gidala niini sa kalibunan sa barangay Ibo siyudad sa Toledo niadtong Huwebes sa alas 5:00 sa hapon ug gipahimuslan.

Ang 7-anyos nga biktima miila sa suspek nga mao si John Continedo, minyo ug usa ka traysikad drayber nga taga barangay Captain Claudio sa samang dakbayan.

Matud pa ni PO3 Jerson Lebumfacil sa Toledo City Police dihang nahinabi sa Banat News gikan sa eskuwelahan ang bata nga naglakaw pauli apan gisugat kini sa suspek ug gipasakay sa traysikad dungan sa pasalig nga ihatod kini sa pinuy-anan.

Sa imbistigasyon ni SPO1 Henry Acosta gidala sa suspek ang biktima sa kasagbutan sa barangay Ibo ug didto gilugos ug pagkahuman gibiyaan.

Usa ka Julita Nases, molupyo sa nahisgutang lugar mao nay nakakita sa biktima nga naghilak nga naglakaw sa dalan ug nagsambilay sa bag bitbit ang iyang panty, gikatahong nagkadugo ang bagtak sa bata hinungdan nga iya kining gihatud sa kapulisan.

Sa pagsukit-sukit sa kapulisan mitug-an ang biktima sa gihimo kaniya sa suspek hinungdan nga gilusad ang hot pursuit operation ug kagahapon sa alas 5:30 sa buntag nasikop si Continedo.

Sa paghimo ning balita ang biktima gipaubos pa sa medical exam ug gipaabot pa ang resulta niini alang sa pagpasaka og kasong pagpanglugos may kalambigitan sab sa child abuse kon R.A. 7610 batok sa suspek.  -  BANAT NEWS