Gym-type bldg sa Unit-2 gikadismaya

CEBU, Philippines - Dismayado ang mga manindahay diha sa Carbon area human masayod sa plano sa kagamhanan sa dakbayan sa Sugbu pagtukod og gym-type building diha sa Unit II.

Ang Cebu Market Vendors Development Cooperative (Cemvedco) diha sa Carbon maoy kusganong misupak sa nahisgutang lakang sa siyudad.

Matud sa chairman sa Cemvedco nga si Erwin Goc-ong nga ang ilang gusto mao ang pagpabarog og building sa maong dapit hulip sa nasunog kaniadto.

Nagtuo si Goc-ong nga dili masulod sa gym-type market ang tanang mga vendors nga naninda kaniadto sa Unit 2 nga anaa karon namaligya sa kadalanan sa Carbon area.

Gipasabot sa chairman sa Cemvedco nga kun mahibalik ang mga vendors sa Unit 2 sa ilang pwesto kaniadto maluag na usab unya ang mga dalan sa Carbon.

Nagkanayon si Goc-ong nga iya nang natugkad nga dili prayoridad sa siyudad ang merkado sa Carbon nga giila ni Goc-ong nga dako og natampo sa ekonomiya sa dakbayan.

“Naa man kahay surplus nga P250 million, unya kun dili sila mogasto ana pagtukod og building mahimo man pud kun ang Cemvedco maoy mogasto,” sumala ni Goc-ong.

Gisaway ni Goc-ong ang dakbayan tungod kay dunay mga kalungsoran nga nasunogan og merkado ang nakapatukod na niini og balik samtang ang dakbayan wala makahimo niini.

Nasayran nga ang planong pagtukod og gym-type building diha sa Unit 2 sa Carbon Public Market iyang ideya ni acting mayor Michael Rama.

Gipasalig hinuon ni City Market Administrator Racquel Bohol-Arce nga siya andam mopatunga tali sa Cemvedco ug sa kagamhanan sa dakbayan.

“I’ll try to meddle, magpatunga ko aron makab-ot gyud ang labing maayong sulosyon diha basta alang lang sa kaayuhan sa atong merkado,” pasalig ni Arce.

Si Arce misaad nga dalhon ang sentimiyento sa vendors sa ilang tigom   karong adlawa ug giawhag si Goc-ong pagduso og position paper aron paghimong pormal sa ilang pagsupak. – BANAT NEWS