CEBU, Philippines - Anaa na sa Bureau of Immigration and Deportation-7 watch list si Pastor Leonardo Jastiva kinsa gitumbok nga maoy mipapatay sa iyang asawang si Judith, human mihimo og pasiunang lakang ang bag-ong BID-7 Regional Director ug Alien Control Officer Casimiro Madarang III.
Giangkon ni Madarang nga bisan pa nga wala pa sila makadawat og kamanduan gikan sa korte nga nagpaubos sa hold departure order kang Jastiva.
Matud pa ni Madarang nga kini pagbantay lamang nga dili nakalikay si Jastiva sa iyang kasong giatubang kun kini tinuod man o dili gumikan kay gikunsiderar nga linoog nga krimen ang pasangil batok kaniya.
Gipasabot ni Madarang nga kung moagi si Jastiva sa ilang area sa tugpahanan ila kining temporaryong pugngan ug tawgan ang ahensyang mikiha batok kaniya ug sulod sa lima ka adlaw nga dili makapresentar og HDO ang reklamante dili na sila makapugong kang Jastiva sa pagbiya sa nasud. - BANAT NEWS