Jabat modawat Grand Perlas Award

CEBU, Philippines - Ang tinamod ug tinahod nga Publisher sa The Freeman ug Publisher-Editor sa Banat News nga si Juanito V. Jabat modawat karong adlawa og Grand Perlas Award nga ihatag sa Philippine Foundation Incorporated (PFI).

Niining ika-22 ka tuig nga pagpanghatag og award, ang PFI mitumbok sa mga kalampusan ni Jabat sa natad sa pameryodiko ug sa kadako sa kaakuhang natampo niini ngadto sa industriya sa media.

Gitumbok niini ang ubos nga kaagi ni Jabat nga nagsukad isip usa ka copyboy sa Manila samtang nagtungha pa sa kursong Journalism sa University of Sto. Tomas.

Nahimong correspondent si Jabat sa nagkalainlaing pamantalaan sa Estados Unidos, Australia, England. Nahimo usab siyang Asia–Pacific correspondent sa Gemini News Service sa London ug sa International News Agency sa Scripps-Howard Company sa New York.

Nahimo siyang reporter sa The Freeman niadtong 1965, nahimong associate editor hangtod nga nahimo siyang editor-in-chief. Niadtong 1994, ang Banat News natukod pinaagi sa iyang konsepto.

Ang awarding himuon karong alas 5:30 sa hapon sa SM City Cebu Theater One. – BANAT NEWS