Tiyan gipusil bala lapos sampot

CEBU, Philippines - Samdan sa tiyan nga milapos sa sampot ug lain pang duha ka samad ang naangkon sa usa ka tawo human kini unaya pagpusil sa iyang kainom didto sa barangay Rosario, lungsod sa Aloguinsan, niadtong Domingo sa alas 10:00 sa gabii.

Ang biktima mao si Jake Estrellas, hingkod, minyo nga taga Rosario, samtang ang suspek mao si Teopriepedes Mancao Jr., hingkod , ug silingan ra sa biktima.

Si SPO2 Felipe Vivar sa Aloguinsan Police Station mibutyag sa Banat News nga ang biktima ug ang suspetsado sa sayo pa nag-inom sulod sa usa ka tindahan sa ilang lugar ug dihang nangalasbag na nagkalalis hangtod nga mipauli ang suspek.

Apan sa pagbalik niini may dala nang armas de fuego nga wala hisayri ang kalibre ug sa walay daghang langas, giluthang niini ang biktima.

Nasabak ang biktima sa tiyan nga milapos sa sampot, walang bahin sa hawak ug sa iyang tiil.

Gidali dayon kini paghatod ngadto sa Vicente Sotto Memorial Medical Center sa dakbayan sa Sugbo samtang ang suspetsado padayon pang gipangita sa kapolisan. - Darrel A. Carumba (BANAT NEWS)