Killer sa midwife gikasohan na
CEBU, Philippines - Pormal nang gipasakaan og kaso kagahapon ngadto sa korte ang usa ka drayber nga mipatay sa usa ka midwife pinaagi sa pagdunggab niini niadtong miaging Domingo didto sa Holy Family Road, Nivel Hills barangay Lahug, ning siyudad sa Sugbu.
Si Onismio Taningco, 43 , nasikop dayon sa kapolisan human niya patya si Dee Ann Alcala, 33 , sa sulod mismo sa balay sa biktima.
Ang biktima usa ka lisensyadong midwife ug sales manager sa usa ka dental and medical supplies.
Si Taningco miangkon nga dugay-dugay na niyang uyab ang biktima ug gumikan sa iyang sobrang pangabubho, napugos siya sa pagpatay niini.
Nasayran sa Homicide Section nga ang suspetsado buot unta nga makig-estorya sa biktima niadtong higayona .
Apan gumikan kay mibalibad kini didto magsugod nga nagkalalis sila ug gumikan sa kasuko sa biktima giligid siya’g labay og botelya niini.
Dihang naupsan na siya’g pailob, mikuha siya’g kutsilyo ug didto gitusaktusak niya pagdunggab ang nagkalainlaing bahin sa lawas sa biktima nga maoy hinungdan sa tinong kamatayon niini.
Hinuon misaad ang suspetsado nga andam niyang dawaton ang isilot kaniya sa hukmanan, matud pa ni Taningco. - Chester Abadilla (BANAT NEWS)
- Latest
- Trending
