Balot vendor gipusil kritikal

CEBU, Philippines - Kritikal ang kahimtang sa usa ka balot vendor human kini pusila sa iyang kustomer didto sa Poblacion, lungsod sa Pinamungajan niadtong Sabado sa hapon.

Ang biktima mao si Erwin Macaporte, 28, minyo, nga taga barangay Bato siyudad sa Toledo ug usa ka balot vendor, samtang ang suspek mao si Dante Dejito, 36, ulitawo, nga taga barangay Saksak, lungsod sa Pinamungajan.

Si PO2 Renante Mahusay sa Pinamungajan Police Station mibutyag sa Banat News nga ang biktima sa sayo pa naninda og balot sa maong lugar dihang giduol sa suspek ug gipangayo-an kini og balot, apan mibalibad ang biktima.

Matud pa ni PO2 Mahusay nga nasuko ang suspek kay gibalibaran ug dayon milanit kini sa gitangkil nga armas de fuego ug gipusil ang biktima.

Gumikan sa kaduol, nasabak ang biktima sa liog , samtang ang suspek dali kaayong nakasirit pahilayo sa maong lugar dihang nakita niining mituay na ang liog sa biktima.

Ang biktima gihatod dayon ngadto sa Pinamungajan District Hospital apan tungod sa katalandugon sa kahimtang niini, gibalhin dayon kini ngadto sa Vicente Sotto Memorial Medical Center (VSMMC).

Samtang ang kapulisan padayon pang nagpangita sa suspek. – BANAT NEWS