Negosyanteng armado gisikop

CEBU, Philippines - Nasikop sa mga otoridad ang usa ka negosyante nga naghupot og mga armas de fuego nga walay lisensya didto sa panimalay niini sa barangay Panas, Consolacion, niadtong Sabado sa buntag.

Ang nadakpan mao si Edwin Alvero, 44, minyo, kinsa naghupot og usa ka 12 gauge shot gun uban sa duha ka mga bala, ug usa ka .38 revolver nga may upat usab ka mga buhing bala.

Misuway unta sa pag-ikyas ang maong suspetsado pinaagi sa pagdusmog niini sa sakyanan sa kapolisan apan tungod kay nabalitok sa pangpang ang iyang sakyanan, wala na kini mahinayon sa pagsirit.

Sila si Insp. Reynaldo Valmoria ug Police Insp. Allan Rosario ug mga kaubanan sa Provincial Intelligence Branch (PIB) ug Special Reaction Unit (SRU) kompleto og search warrant nga giluwatan ni Judge Soliver Peras sa Regional Trial Court Branch 10, sa ilang pagsikop kang Alvero didto sa iyang panimalay.

Ang pahupot og armas nga walay lisensya usa ka paglapas sa Republic Act 8294 nga nagtangag og mabug-at nga silot.

Sumala sa kapolisan nga dihang nasayran nga diha na sila sa gate sa balay niini, migawas dayon si Alvero ug bisan pa kun gipara siya sa kapolisan wala gyud mohunong ug gani gipadasmagan pa ang usa sa mga sakyanan polis.

Apan malagmit gumikan sa kakuyaw ug kakulba, misuway pa gyud kini og pabulhot sa iyang sakyanan apan inay mosubay sa karsada, nabalintong hinuon kini ngadto sa pagpang.

Hinuon dili pa tantong dimalas kay nakaikyas man siya gikan sa tinong kamatayon sa iyang pagkahagbong sa pangpang.

Apan wala siya kaikyas sa posas sa kapolisan ug siya na mismo maoy mitunol ngadto sa kapolisan sa iyang mga armas nga walay lisensya.

Misaksi usab sa maong pagsurender niya sa iyang mga armas mao sila si Konsehal Danilo Pitogo ug Konsehal Joel Paypuyat sa barangay Panas. – BANAT NEWS