3 gipamusil, 1 ang namatay

CEBU, Philippines - Tulo ka tawo ang nabiktima sa pagpamusil usa niini patay nang naabot sa tambalanan nga nahitabo niadtong Sabado ug kagahapon gikan sa tulo ka barangay sa dakbayan sa Talisay.

Patay na nga nadangat sa Talisay District Hospital ang usa ka 52-anyos nga lalaki human kini pusila sa wala mailhing kriminal kinsa nagsul-ob og bonnet kagahapon sa buntag sa sitio San Rafael , barangay Tanke, dakbayan sa Talisay.

Ang biktima giila sa mga polis nga si Genaro Jakosalem, residente sa nahisgutang lugar nakaangkon og usa ka samad pinusilan sa tuong bahin sa nawong nga maoy gituohang hinungdan sa kamatayon niini.

Si PO2 Tano sa pagpakighinabi niini sa Banat News nagkanayon nga si Jakosalem nagtrabaho isip gwardiya sa container van nga gipanag-iya sa pamilyang Canton nga nahimutang diha sa ilang lugar.

Sa wala pa mahitabo ang insidente ang biktima nakig-inom sa mga silingan dihang miabot ang mamumuno ug mipusil kaniya, na-recover sa mga polis ang usa ka magazine sa pistola nga dunay pito pa ka buhing bala sa kalibre .45.

Sa laing bahin, nakaangkon og samad pinusilan sa tuong tiil ang usa ka 30-anyos nga lalaki human kini pusila sa wala usab mailhing tawo kagahapon sa kaadlawon diha sa Base Beach, barangay Cansojong.

Ang biktima mao si Ronald Sanchez residente sa maong lugar kinsa migawas sa ilang balay aron mopalit unta og beer apan usa ka wala mailhing lalaki ang kalit lang mipusil pag-abot sa ngitngit nga lugar, sa kahadlok sa biktima misirit kini og dagan ug nagpadala sa tambalanan.

Samtang nalandig usab sa tambalanan ang usa ka 54-anyos nga lalaki human pusila sa usa ka wala mailhing tawo samtang kini natulog diha sulod sa ilang balay niadtong Sabado sa gabii sa barangay Tabunok.

Ang biktimang si Presiano Deiparine nakaangkon og samad pinusilan sa iyang bat-ang nakakamang pa ilawom sa lamesa aron pagtago sa iyang kaugalingon nga dili na maigo pa og laing bala. – BANAT NEWS