CEBU, Philippines - Patay ang usa ka gidudahang drug pusher nga dinakpan sa usa ka drug operation sa kapolisan ug naangol usab ang usa ka 13-anyos nga batang babaye human gikatahong girakrakan sa mga kaubang pusher alas-8 pasado ang takna sa miaging gabii sa Zone 3 barangay Mantuyong, dakbayan sa Mandaue.
Ang namatay mao si Rodulfo Sabrozo Jr., 21, nagpuyo sa maong dapit kinsa unang nadakpan nila ni PO3 Benedict Modina sa gihimo nilang buybust operation sa maong dapit sa miaging gabii, samtang naangol usab ang usa ka 13-anyos nga dalagita nga naigo diha sa tiyan.
Apan ang hepe sa Station 1 nga si Insp. Ocampo wala mokumpirmar nga dunay anti-illegal drugs operation nga nahitabo tungod kay ang sa ilahang blotter shooting incident ra gyud ang natala.
Kini misukwahi sa kumpirmasyon ni Mandaue City Police Office director Sr. Supt. Rolando Ualat nga nahinabi sa The Freeman (igsuong pamantalaan sa Banat News) ingon man ni Sr. Supt. Insp. George Aniñon sa Mandaue City Police Office Homicide Section ug mao usab ang luyo-luyong hepe sa Investigation and Detective Management Branch nga parehong mikumpirmar nga dunay operation sa lugar ang mga sakop sa City Anti-Illegal Drugs Special Operations Task Force pinanguluhan ni PO3 Modina.
Si Sabrozo gikatahong nadakpan sa mga polis sa usa ka buybust operation sa sayo pa ug napalitan kini og usa ka paketeng may sulod nga gidudahang shabu ug laing siyam pa ka gagmay'ng pakete diha sa iyang posesyon.
Kini gikatahong miangkon sa iyang pagpamaligya sa maong illegal nga drugas ug gikatahong mihangyo sa kapolisan nga iyahang tultulan ang kapolisan sa mas dako pang drug pusher sa ilang bugti sa iyang kagawasan ug mitumbok sa giingong shabu queen nga usa ka Inday Catanduay hinungdan nga gisusi kini sa kapolisan kuyog si Sabrozo.
Apan sa pag-abot sa mga polis kalit nga mipaka-paka ang buto sa armas ug nangaigo sila si Sabrozo ug ang bata, gikatahong naabtan pa unta sa kapolisan sila si Catanduay ug ang usa ka Virgil “Aying” Harayo nga nag-repack og shabu apan nakaeskapo.
Si PO1 Lino Baylosis mibutyag nga ang maguwang sa 13-anyos nga dalagita nga si Arlyn Catandijan mitug-an kanila nga nakadungog siya og buto sa armas ug dihang iyang gisusi mao nalay iyang nakit-ang nagbuy-od ug nagkadugo na ang iyang manghod, dihang iyang giduol ang bata kini gikatahong miingon “Te naigo ko.”
Ang bata gidala dayon sa Mandaue District Hospital ug gibalhin sa Cortes General Hospital, samtang si Sabrozo nga nakit-an nalang sad nga samdan sa walang bahin sa dughan gitabang sa mga silingan ug gidala sa susamang tambalanan apan gideklarar nga dead on arrival.
Matud pa ni Ualat nga ilahang susihon ang relasyon sa biktimang 13-anyos tungod kay dili layo kaayo ang apelyedo niini sa apelyedong “Catanduay,” si Sabrozo ug ang bata pulos managsilingan lakip na si Catanduay, nagduda ang mga polis nga posibleng buot nga linglahon ni Sabrozo ang kapolisan.
Dugang pa ni Ualat nga dako ang ilang pagtuong ang mga kaubang pusher ni Sabrozo maoy mipusil sa naulahi tungod kay ang buto sa pusil diha maggikan sa sulod sa balay ni Catanduay. - Uban sa report ni Niña Sumacot sa The Freeman (BANAT NEWS)