Mastermind sa pagpatay 'ilhan

CEBU, Philippines - Mastermind sa pagpusil-patay sa negosyanteng si Lalaine Jore nailhan na sa kapulisan sa dakbayan sa Sugbu human masikop si retired Sgt. Filomeno Amistad niadtong Sabado sa hapon sa panimalay niini sa dakbayan sa Carcar kinsa gitumbok nga maoy gunman.

Si Chief Insp. George Ylanan chief sa Investigation and Detective Management Branch (IDMB) nga human nila madakpi si Amistad ila nang natumbok ang motibo sa pagpusil-patay sa negosyanteng si Jore.

Matud pa niini nga ang akusadong si Amistad positibong giila sa duha ka mga saksi nga mao gyu'y mipusil kang Jore niadtong Pebrero 17 sa gabii sa tindahan niini nga Gorordo Convenience Store nga nahimutang sa barangay Camputhaw.

“Possible na ang identity sa mastermind sa krimen apan dili lang una nato ma-devulge tungod kay duna pa man mi gisubay sa imbestigasyon,” sumala pa ni Ylanan.

Gitan-aw pa usab nila ang uban pang anggulo nga makatabang pa sa ilang pagpalig-on sa kasong ilang ipasaka batok sa akusadong si Amistad apan sa ilang bahin makonsiderar na nga sulbad ang kaso.

Giklaro usab niini nga dili nila matumbok kun gun-for hire ba si Amistad apan dako ang ilang pagtuong duna lang gyu'y tawong nagsugo niini nga ipapatay si Jore.

Kasong murder ingon man illegal possession of firearm ang ilang ipasaka karong adlawa batok kang Amistad dihang nakuhaan usab kini nila’g .9mm pistol ug pito ka bala atol sa pag-aresto kaniya diha sa barangay Poblacion III dakbayan sa Carcar.

Gihulagway niini nga ilang naisahan si Amistad dihang usa nila ka policewoman nga sakop sa intelligence ang nagpatabang ngadto kang Amistad nga aduna i-serve nga warrant of arrest diha sa ilang dapit.

Hinungdan nga dihang migawas kini sa iyang panimalay ang tinted nga sakyanan sa Cebu City Police nga sakay ang duha ka mga saksi positibong mitudlo kaniya hinungdan nga gidakop nila kini.

Gihulagway sab sa kapolisan base sa impormasyong ilang nadawat sa lugar nga ‘untouchable’ diha sa ilang lugar si Amistad ug dili gyud madali-dali’g sikop hinungdan nga ila gyud nga gi-surveillance daan ang dapit sa wala pa nila kini dakpa ug lima ka team sa CCPO ang ilang gidala.

Dugang pa niini nga bisan unsaon pag-adjust ang footage nga nakuha sa CCTV ug ikumparar sa hulagway niini mao ra gihapon ang profile sa suspetsadong si Amistad, pun-an pa nga positibong giila sa duha ka saksi matud pa sa kapolisan.

Nasayran namatay pipila ka oras ang biktimang si Jore human makaangkon og nagkadaiyang samad pinusilan sa lawas dihang gipusil sa mga akusadong nag-inom pang daan og beer sa tindahan sa biktima.

Apan ang kapulisan una nang mipadayag nga pinaagi sa CCTV camera ilang nailhan ang mga suspetsado nga nakuha niadtong higayuna. – BANAT NEWS