Fire prevention month saulogon

CEBU, Philippines - Ang mga tinun-an sa 3rd year ug 4th year high school sa tanang pampublikong tunghaan sa dakbayan sa Talisay maoy maglangkob sa Fire Olympics nga kabahin sa pagsaulog sa fire prevention month sugod karong adlawa.

Ang Talisay City Fire Marshal nga si Felipe Canillas mibutyag sa Banat News kagahapon nga ilang tumong mao nga mahimong responsable ug magmabinantayon ang tanang tinun-an kabahin sa paglikay sa sunog.

 Matud niya nga tungod sa pagpabaya, daghan ang nawagtangan og kabtangan ug dunay namatay sa sunog.

Gawas sa pag-edukar sa publiko bahin sa paglikay sa sunog, ang kabomberohan sa dakbayan mopahigayon usab og earthquake drills sa mga tunghaan ug mga establisamento, ug motubag usab sila sa ubang mga emerhensiya sama sa pagtabang og usa ka tawo nga nagkinahanglan og first aid.

Sa programa ilusad agig pamukas sa maong kasaulogan, si Mayor Socrates Fernandez maoy guest speaker.

Samtang ingon usab niini ang ipahigayon karon sa Lapulapu City diin si Kapitan Paz Radaza sa barangay Mactan maoy pinasidunggang dinapit sa maong kasaulogan sa tibuok nasud uban sa tema nga “Fire Safety A Challenge, Concern and Priority for Everybody.”

Sama sa dakbayan sa Talisay, may ipahigayon gihapong motorkada ang kabomberohan uban sa ilang mga sakyanan nga mosubay sa tanang kadalanan sa dakbayan.

Si Lapulapu City Fire Marshal F/C Insp. Recardo Cornellio maoy mangunay sa pag-inspection sa mga establisamento aron pagsuta kun gituman ba niini ang mga fire safety requirements nga gipatuman sa balaod.

May seminar workshop usab silang ilusad didto sa maong dakbayan aron bansayon ang katawhan bahin sa pagpawong sa sunog ug sa pagluwas usab niadtong mga masunogan. - Brenda D. Batuto ug Bong Soriano (BANAT NEWS)