CEBU, Philippines - Irikomendar sa Cebu City Traffic Operations and Management (Citom) ang pagkansilar sa excavation permit sa Livan Trading, kontraktor sa pagpanglungag sa mga karsada ning syudad.
Kini tungod sa giingong pagkagahi og ulo sa maong kontraktor pagtuman sa gilatid sa Citom nga mga panginahanglan.
Sa nasayran, ang Livan Trading maoy gikuhang kontraktor sa Globe-Innove pagkawot sa kadalanan alang sa ilang communication lines.
Matud ni Citom executive director Arnel Tancinco nga adunay onse ka location dinhi sa dakbayan ang gikuykoyan sa nahisgutang kontraktor.
Apan gusto sa Citom board nga kinahanglang mogamit ang Livan og lighting equipment o Early Warning Device (EWD) sa gipangkubkoban niini.
Kini aron malikayan ang disgrasya ilabi na sa mga motorista nga dili makabantay sa gipangkawtan niining mga dalan sa dakbayan.
Apan sumala ni Tancinco nga wala panumbalinga sa kontraktor ang ilang sugyot hinungdan nga ilang gipasuspenso ang permit niini.
Gitugotan hinoon nga makabalik sa ilang trabaho ang Livan Trading ubos sa kondisyon nga tumanon niini ang pagbutang og EWD duol sa dapit nga gipangkawtan.
Apan namatikdan sa pipila ka mga sakop sa Citom board niadtong miaging semana nga wala gihapon tumana sa maong kontraktor sa gisaad niini.
Kini ang hinungdan nga nakahukom ang Citom board pagrekomendar nga kanselahon na ang excavation permit sa Livan Trading ug i-ban sa dakbayan. - Elly Bolonos (BANAT NEWS)