CEBU, Philippines - Nagpusil ang usa ka ginang atubangan sa iyang bana sulod sa ilang kwarto sa wala pa mahibaw-ing hinungdan pasado alas-8 sa buntag kagahapon sa sitio Calero barangay Tinago ning dakbayan.
Si Mariless Masayon Deso-Abido, 24, lumad nga taga syudad sa San Carlos, Negros Occidental ug kasamtangang nagpuyo sa nahisgutang lugar nga usa ka promodiser sa usa ka department store dinhi sa Sugbo gikatahong nagpusil sa iyang kaugalingon atubangan sa iyang banang si Edwin Deso-Asido nga usa ka gwardiya.
Matud pa ni SPO1 Jay Yballe, chief investigator sa Cebu City Homicide Section nga ang bana sa biktima misaysay kaniya nga ang iyang asawa gikan pa sa ilang dapit sa Negros tungod kay miuli kini sa miaging adlaw ug nagkaestorya sila kabahin sa mga pagmahay sa usa’g-usa.
Nagtuo siyang nagkauliay na ang ilang mga buot niadtong tungura apan sa paggawas niya sa banyo iya nalang nakit-ang nagtion na kini og armas sa iyang tiyan.
Buot unta niyang ilugon ang armas apan wala na niya kini maabti kay gipabuto na dayon sa iyang asawa hinungdan nga nakaangkon kini og samad pinusilan sa tiyan nga milapos sa likod nga bahin sa iyang lawas.
Daling gidala ang biktima sa Perpetual Soccuor Hospital ug hangtud ning pagsuwat sa balita wala pa matino ang kahimtang niini.
Dugang pa ni Yballe, base sa pamahayag sa mga silingan sa magtiayon, sa milabay’ng semana nagsige og away ang duha tungod sa selos tungod kay nagduda ang asawang may gikabuangang laing babaye ang iyang bana.
Ang kalibre .38 rebolber nga may usa kabhang ug upat ka buhing bala nasuta sa kapolisan nga maoy service firearm sa bana hinungdan nga gikwestyon kini karon sa kapolisan kun nganong nadala niini ang maong armas sa panimalay.
Apan depensa pa sa gwardiya nga walay kabutangan sa iyang armas diha sa iyang gibantayang tindahan hinungdan nga iya kining gidala-dala.
Giimbitar kagahapong adlawa ang bana aron sa pagpa-paraffin test ug gikatakda usab nga himuon usab kini ngadto sa asawa kun tugutan sa mga doctor aron pagtino kung si kinsa gyu’y nakapabuto sa maong armas. - BANAT NEWS